Теріскейінсіз күнгейі көңірсімейтін бұл өмірде әлдебір қиналыссыз, моншақтаған ащы терсіз кімде-кімнің саусағына жеміс дәні ілінбек емес. Бірақ, бұл Өмірден баз кешіп, сары уайымға салынып кету керек дегенді меңземесе керек. Ақтөбеде «Екі езу» театры әртістерінің қатысуымен 23-24 тамызда премьерасы болатын сатиралық спектакль «Әттең, қысқа өмір-ай...» деп аталады. Спектакль өмірге құштарлықты, өмірді өліп-өшіп сүюді, осы өмірдің қызығын талмай жұтуды насихаттайды. Адасып жүрген жастар үшін де тәрбиелік мәні жоғары.
«ҚОЙЫЛЫМ ӨМІРДІ СҮЮГЕ ЖЕТЕЛЕЙДІ»
Дейді сатиралық жанрдағы спектакльдің режиссері, Ғабит Мүсірепов атындағы республикалық балалар мен жасөспірімдер театрының қызметкері Сағызбай Қарабалин.
- Спектакль сатиралық жанрда көрсетіледі. Басты кейіпкер 80-ге келген үш шал. Әзірейіл жанын алуға келсе де, «өмірді сүйетіндіктерін» дәлелдеп, өлімнің өзін жеңіп шығады. Пенде деген қай уақытта болсын, өз еркімен өлгісі келмейтіні шындық қой. Бірақ сол өлгісі келмейтінінің өзін Әзірейілге дәлелдеп шығып, 40 жастағы келіншекке үйленетін адамның басынан кешкен оқиғасы әдемі әзілмен, астарлы қалжыңмен үндескен. Тіпті бір персонаждың мынадай сөзі бар «Өлімнің өзі менің өмірді сүйетіндігіме уәж таппағасын, кері кеткен» деген! Міне, көрдіңіз бе? Өмірге деген ынтықтық, ғашықтық, сүйіспеншілікті дәлелдеу де үлкен күш! Спектакль туралы айтар болсам, ұзын-ырғасы, мағынасы осыған саяды. Әрине, естіген бір бөлек, көрген бір бөлек. Сондықтан премьераны өз көзімен көруге шақырамын.
«Әттең, қысқа өмір-ай» сатиралық спектаклінде басты рөлдерді жергілікті «Екі езу» театрының әртістері Берік Нұрмағамбетов, Қаржау Тәңірбергенов, Бекбол Тәтебаев және Құралбек Құрманғалиев ойнайды. «Пай, пай, Өмір! Өтесің-ау бір күні,
Тиясың-ау қуанышты, күлкіні.
Өмір деген — бір жарқ еткен найзағай,
Өмір деген — көк аспанның күркірі.
Пай, пай, Өмір! Өтесің-ау бір күні», — деп арқалы ақын Мұқағали Мақатаев күрсіне жырлағандай, өмір — таңғажайып дүние, сырлы, жұмбақ, қайталанбас әлем. Бірақ, әттең, тым шолақ-ау, шолақ.
«Өмір — теңіз, Өтіп кетем демеңіз,
Ізгіліктен жаралмаса кемеңіз», — дейді шығыстың бұлбұл ақыны Рудаки. Шынында, өмір өткелі жеңіл емес. Одан қиналмай өту — әркімге көгілдір арман, тәтті қиял.
Міне, Өмірдің мәні дегеніміз осы.
Нұрлыбек Жұбатқан, «Екі Езу» театрының директоры:
- Қазір өмірді емес, өлімді көп айтатын болып кеттік. «Ана өмір» жайлы бесіктен белі шықпаған балаға дейін пәлсапа соққан кезде, жағаңды ұстайсың... Ау, алдымен осы өмірді жарытып сүріп алайық та?! «Ана өмірге барғанда бәлен боласың» дейді. Сол жақтың да жағдайын осы жақта жасап алған дұрыс емес пе? Өзі қамшының сабындай қысқа өмірде алысып, жұлысып, біреуге кек сақтап, өштесіп, қырғи-қабақ болып өтудің қандай қажеттілігі бар? Бұл спектакль де көрген адамға ой салатындай, ойландыратындай терең философияға құрылған. Адамдарды оптими-змге жетелеу, өмірді барлық қиындығы мен теперішіне қарамай сүюді насихаттау мақсатында құрылған астарлы спектакль әлемі әзілдермен көмкерілген. Сондықтан қазіргі пассивтік көзқарас жастарды жаппай жаулап кетпей тұрғанда, мұндай тәрбиелік мәні бар дүниелерді көп көрсетуіміз қажет деп есептеймін.
Ойтүйін:
Сонымен сатиралық спектакльдің премьерасы 23-24 тамызда Тахауи Ахтанов атындағы драма театрында өтеді. «Әттең, қысқа өмір-ай» деп өкініп емес, өмір сүруге бекініп шығатындарыңызға күмәнім жоқ. Ал Өмір дегеніміз не? Бұл сұраққа кім
Индира Кереева
|
