Кәдімгі тастарды қолданып тамаша өнер туындыларын жасауға болады десе сенесіз бе? Ақтөбеде қолынан бал тамған сондай өнерлі суретші бар. Ол -Мақсат Жаңабаев. Яшма, кокс, омозанит пен мәрмар тастарын суретші Мақсат Жаңабаев өз туындыларының шикізаттары ретінде пайдаланады. Әрине, қара тастың кез келгені сурет құралы бола алмайды. Сондықтан, суретші Мақсат Жаңабаев тау-тасты жиі аралайды. Ал мәрмәрді құлпытастың қалдықтарынан жинайды. Одан соң тас түйіршіктері бірнеше мәрте жуылады. Жұмыр тасты қақ жарып, оны түрлі кейіпте уақтау үшін көп күш қажет. Тарыдай, одан да ұсақ тастар елеп-екшелген соң, қалдықтарын күлдей етіп, диірменге тартады. Уатылып, суға бірнеше мәрте жуылған тастардың табиғи түсін сақтап қалатындары сирек. Мақсат оны өз қажетінше ал-уан түске бояйды. Түстердің санында шек жоқ.Суретші үнемі табиғатты бейнелейді. Оның айтуынша, дархан даланың төсіндегі қаншама құбылмалы түстің барлығы туындыда өз үйле-сімділігімен орын алса, шығарманың сәтті шыққаны екен. Майлы бояудың үстіне тас ұнтағын себу аса ұқыптылықты қажет етеді. Көз майын тауысып, еппен жасалатын жұмыстың дайын болу уақыты әр түрлі. Көбіне шабытқа байланысты. Мақсаттың туындыларының қай қайсысы да бағалы. Оның шығармаларына сұраныс та жоқ емес. - Тапсырыстар жиі түсіп жатады. Қазір жұрт зәулім үйлеріне қытайдың арзан картиналарын алмайды. Өздеріне ұнайтын авторлық жұмыстарды алғысы келеді. Майлы бояу, зергелік бұйымдардан жасаймын,-дейді Мақсат Жаңабаев. Қиялы ұшқыр Мақсаттың мамандығы - көлік жөндеуші. Соңғы жылдары ғана бала кезден өзімен біте қайнасып келе жат-қан суретшілік өнеріне қамшы салған.Бұған дейін ол көңілінің хошы болғанда ғана сурет салатын. Қазір үнемі ізденіс үстінде. Оның шығармашылыққа бет бұрғанына көп уақыт бола қойған жоқ. Дегенмен шаруасы дөңгеленіп келе жатқан Мақсат бүгінге дейін жиырмадан аса картина салған. Қазақстандықтар арасында оның туындылары жоғарғы бағаға ие болды. Өз ісін шыңдай түсу үшін әуесқой суретшінің кәсібилермен тәжірибе алмасу ойы бар. Мақсат секілді тастан зергерлік сурет салатындар Ақтөбеде жоқтың қасы. Бірақ оның өнеріне қызығушы жастар көп. Үйренуге ниеттілерді баулу үшін тә-жірибе қажет. Сондықтан Мақсат шәкірт тәр-биелеуге әлі ерте деп отыр. Әзірге оның жанында қол ұшын беріп жүрген інісі Жадырасын бар. Ол да ағасы секілді өнерге бейім. Екеулеп зергерлік сурет өнерін дамытпақ ойлары бар. Мақсат Жаңабаевтың болашаққа жоспары көп. Жаңашылдыққа жаны құмар әуесқой суретші өнерін шыңдау үшін бар күшін сарп етпекші. Жаңалық Ахаш